Desenvolvemento integral

Na Educación Primaria acompañamos aos nenos e nenas nunha etapa decisiva do seu crecemento, ofrecéndolles un contorno próximo, seguro e estimulante que favorece a aprendizaxe con entusiasmo, o descubrimento dos seus talentos e o desenvolvemento persoal.

Bases da aprendizaxe

Partimos dunha base sólida que combina a adquisición dos contidos curriculares, o desenvolvemento de hábitos de traballo, o respecto polas rutinas e o esforzo diario, xunto cunha aprendizaxe activa baseada na experimentación, nos proxectos, nos materiais manipulativos, na lectura diaria, na expresión oral e no uso responsable da tecnoloxía, favorecendo unha comprensión profunda e un progreso constante.

Desenvolvemento persoal e convivencia

Coidamos o seu desenvolvemento emocional, social e espiritual, axudándolles a coñecerse mellor, a convivir, a traballar con outros e a expresar o que senten e pensan con respecto e confianza. Procuramos que aprendan a mirar a realidade con curiosidade, sensibilidade e sentido crítico, comprendendo o valor de cada experiencia e das decisións que toman no seu día a día.

Familia e acompañamento

Todo este proceso vívelo en estreita colaboración coas familias, parte esencial da nosa comunidade educativa, acompañando de xeito conxunto a cada neno e nena no seu crecemento integral e no desexo de aprender e aportar o mellor de si ao mundo.

Aspectos destacados

Horta de Verdi

Un espazo de aprendizaxe vivo no que os nenos cultivan os seus propios bancais. Alí plantan, regan, coidan e observan como medran as súas hortalizas, flores e plantas aromáticas, para despois recoller os produtos e levalos a casa. Este proxecto permite que se conecten coa natureza, comprendan o ciclo da vida e gocen da experiencia de ver medrar aquilo que eles mesmos coidaron.

Materiais manipulativos

En gran parte das materias deseñamos e elaboramos os nosos propios materiais, algúns deles manipulativos para que a aprendizaxe sexa máis significativa. Estes recursos permiten aos alumnos "tocar" os contidos, experimentar, descubrir e afianzar coñecementos de xeito dinámico, visual e adaptado a cada nivel.

Traballo por proxectos

Nalgunhas materias reforzamos os contidos coa elaboración de proxectos que conectan os contidos coa vida real. Os alumnos investigan, crean, toman decisións e traballan en equipo, desenvolvendo así competencias clave mentres viven unha aprendizaxe motivadora, activa e profunda.

Ensinanza do inglés

O programa English for Cambridge (EfC) creouse para ofrecer aos alumnos a oportunidade de mellorar o seu nivel de inglés e preparar os exames oficiais da Cambridge University de xeito interactivo e divertido. Os nenos de primaria reciben 5 horas adicionais ás horas de Inglés curricular e Arts and Crafts, onde falan, len e aprenden a fonética inglesa a través do xogo, cancións e proxectos.

O noso obxectivo é que todos os alumnos vaian gañando confianza no uso do idioma e que lles sirva para o seu futuro persoal e profesional.

Biblioteca de aula

Cada aula conta coa súa propia selección de libros e un tempo diario de lectura para toda a etapa de Primaria. Este hábito lector complétase coa Biblioteca Escolar, que amplía recursos e experiencias, fomentando o gusto pola lectura e o descubrimento persoal.

Expresión oral / Oratoria

Desde os primeiros cursos traballamos a expresión oral mediante exposicións sobre diferentes temáticas. Este proceso non só implica falar en público, senón tamén investigar, seleccionar e contrastar información, desenvolvendo así habilidades comunicativas e pensamento crítico.

Emprego de ferramentas dixitais

En 5.º de Primaria incorporamos o iPad como ferramenta de aprendizaxe dentro dun modelo híbrido. Apostamos por un uso responsable e equilibrado da tecnoloxía, complementado con dinámicas que fortalecen hábitos de traballo coidados, organizados e rigorosos. Deste xeito formamos alumnos capaces de desenvolverse con soltura en contornos dixitais sen perder aquelas destrezas esenciais que os acompañarán toda a vida, porque cremos nun equilibrio que forma alumnos competentes tanto no dixital como no analóxico.

Ciencias

Nas áreas de Ciencias fomentamos o traballo colaborativo, a investigación activa e a elaboración de maquetas e experimentos. Cada curso remata coa nosa feira científica, onde os estudantes comparten os seus proxectos, descubren novas vocacións e desenvolven unha mirada curiosa cara ao seu contorno.

Traballo cooperativo

O traballo cooperativo é clave no noso día a día. A través de dinámicas estruturadas, os alumnos aprenden a coordinarse, asumir responsabilidades, tomar decisións e construír xuntos unha aprendizaxe significativa, respectuosa e enriquecedora.

Experiencias pastorais

Procuramos crear experiencias e acompañar aos nenos e nenas no descubrimento de Xesús, axudándolles a recoñecer que Deus está presente na súa vida de xeito próximo e significativo. O noso obxectivo é ofrecer espazos de encontro, de interioridade e fomentar unha relación persoal con Xesús que xurda do vivido, do sentido e do compartido.

Baúl Mag+s

Para favorecer este proceso, utilizamos a metodoloxía Baúl Mag+s, un recurso que axuda a dar nome e sentido á experiencia de fe. A través da Palabra, da liturxia, do silencio e da expresión persoal, convidamos aos nosos alumnos a "mirar por dentro" e a atopar palabras para aquilo que xa viven e senten.

Participación das familias

Dámoslle un valor especial á relación familia–escola e coidamos cada ocasión para fortalecela. As familias son unha parte imprescindible da nosa comunidade educativa e a súa presenza enriquece a vida do centro. Por iso, convidámolas a participar activamente en múltiples actividades: festivais, celebracións, contacontos, visitas á capela ou colaboracións en distintos proxectos que permiten vivir o colexio como un lugar compartido.